Útlínur framtíðar
Útlínur framtíðar – stefna Íslands um hönnun og arkitektúr til 2030 leggur áherslu á hönnun sem drifkraft nýsköpunar, verðmætasköpunar og sjálfbærrar þróunar. Hún nær yfir fjölbreytt svið, allt frá vöru- og þjónustuhönnun til byggingarlistar, skipulagsmála og opinberrar þjónustu, og horfir til þess hvernig hönnun getur bætt lífsgæði, aukið samkeppnishæfni og styrkt ímynd Íslands á alþjóðavettvangi.
SStefnan var mótuð í samvinnu við fjölda samstarfsaðila, og hag- og fagaðila gegnum Miðstöð hönnunar og arkitektúrs en miðstöðinni var komið á fót að frumkvæði stjórnvalda árið 2008 til þess að efla íslenska hönnun og arkitektúr sem listgreinar og grundvöll þeirra til atvinnusköpunar. Miðstöð hönnunar og arkitektúrs er beintengd grasrót og atvinnulífi hönnunargreina en að henni standa níu fagfélög með alls 1200 félaga sem eiga og reka hana með stuðningi stjórnvalda gegnum menningar- og viðskiptaráðuneyti.
Stefna hönnunar og arkitektúrs til 2030.
„Framtíðarsýn okkar er að aðferðafræði hönnunar og arkitektúrs sé markvisst nýtt til þess að auka lífsgæði á Íslandi með áherslu á verðmætasköpun og sjálfbærni fyrir samfélagið í heild. Við getum aukið gæði, bætt heilsu og mannlíf, skapað áhugaverð störf og hraðað uppbyggingu og verðmætasköpun með því að virkja krafta sem sannarlega búa í íslensku hönnunarsamfélagi,“ segir Lilja Alfreðsdóttir menningar- og viðskiptaráðherra.
Ísland í fremstu röð í Evrópu í stefnumótun á sviði hönnunar og arkitektúrs
Í nýlegri evrópskri skýrslu Design Policy Mapping in Europe er Ísland því sett fram sem mikilvægt viðmið fyrir önnur Evrópulönd sem vilja efla hlutverk hönnunar í opinberri stefnumótun. Þar er íslenska stefnan sögð ein sú heildstæðasta í Evrópu og er nefnd sem mikilvægt dæmi um hvernig hönnun getur verið framtíðarmiðuð og orðið órjúfanlegur hluti af stefnumótun samfélagsins í heild.
Skýrslan er kortlagning á hönnunarstefnum 39 Evrópulanda, unnin af BEDA. Hún byggir á fyrri skýrslu um evrópskar áherslur á hönnun og arkitektúr frá 2018 og veitir yfirsýn yfir nálgun stjórnvalda í málefnum hönnunar og varpar ljósi á hvernig hönnun er felld inn í þjóðarstefnur sem spanna allt frá menningu- og skapandi greinum, rannsóknum og þróun, samkeppnishæfni iðnaðar, hringrásarhagkerfi, stafrænni umbreytingu yfir í hið byggða umhverfi.
Umsögnin staðfestir að Ísland er á réttri leið í að nýta hönnun sem lykiltæki til framtíðar, ekki aðeins innan skapandi greina, heldur í samfélaginu öllu.
